Аслиддин Шарипов, бародари Шавкати Муҳаммад, мудири телевизиони "Паём", расонаи вобаста ба ҳизби дар Тоҷикистон мамнӯи наҳзати исломӣ аст.

Ба нақли пайвандонаш, ӯ моҳи сентябри 2022 дар Русия дастгир ва якуми октябри имсол ба Тоҷикистон истирдод шуд, вале ҳанӯз ҷойи нигоҳдорияш маълум нест.

Мақомоти Тоҷикистон сабаби боздошт ва дар куҷо будани Аслиддин Шариповро эълон накардаанд.

Ба хулосаи Додситонии Тагилстроев дар Нижний Тагили Русия ӯ ба ҳамкорӣ бо созмонҳои мамнуъ ё таблиғи онҳо тавассути интернет (қисми дуи банди 307(3)-и Кодекси ҷиноии Тоҷикистон) гумонзад аст. Дар сурати исботи иттиҳом ба ӯ аз панҷ то ҳашт сол зиндон таҳдид мекунад.

Шавкати Муҳаммад, бародари Аслиддин Шарипов, рӯзи 9-уми октябр ба Радиои Озодӣ гуфт, муроҷиати пайвандонашон барои дақиқ кардани ҷойи нигаҳдории ӯ то ин дам бенатиҷа будааст.

"Мурофиааш дар Русия як сол идома дошт," -- гуфт Шавкати Муҳаммад ва илова кард, ки мақомоти Тоҷикистон ӯро ба ҳамкорӣ бо Ҳизби мамнӯи наҳзати исломӣ ва "Гуруҳи 24" муттаҳам медонанд. Чизе, ки ба гуфтааш "ҳақиқат надорад".

Додситонии Тагилстроев низ дар хулосааш бо такя ба иддаои ҷониби Тоҷикистон гуфтааст, Аслиддин Шарипов дар Фейсбук гуё ба ҳимоят аз ҲНИТ ва "Гурӯҳи 24" матлаб нашр мекард ва аз соли 2021 дар ҷустуҷӯ буд. Фаъолияти ҳизби наҳзати исломӣ дар ҳудуди Русия низ мамнуъст.

"Дуруст аст, ки дар Фейсбук ба монанди ҳар шаҳрванди дигар саҳифа дошт, аммо назари худашро менавишт. Фикр мекунам, ҳамаи ин баҳона аст, ҳадафи мақомоти Тоҷикистон бастани даҳони ман аст," – гуфт Шавкати Муҳаммад.

Дар ҳамин ҳол, Нина Четверткова, вакили мудофеи Аслиддин Шарипов дар Русия, аз пайвандонаш хостааст, барои ҳимояти ӯ дар Тоҷикистон адвокат бигиранд. "Ҳашт рӯз боз аз ӯ дарак нест. Вакили мудофеъ гиранд ва бар асоси қонун ҷойи нигоҳдорияшро маълум кунанд," – гуфт ӯ.

Вай афзуд, дар муддати як сол кӯшиш карданд, ки Аслиддин Шариповро аз боздоштгоҳи Русия раҳо ва аз истирдодаш ба Тоҷикистон пешгирӣ кунанд, аммо нашуд. "Барои муваққатан додани ҳаққи гуреза ба мақомоти Русия муроҷиат кардем, вале ҷавоб надоданд," – илова кард ӯ.

Мақомоти Тоҷикистон дар соли 2022 наздик ба сад нафар, аз ҷумла 18 гумонбар ба терроризму ифротгароиро аз кишварҳои хориҷӣ, аз ҷумла Русия ба Душанбе оварда, бархеро ба муҳлатҳои дароз зиндонӣ карданд.

Аслиддин Шарипов аз ноҳияи Ашти вилояти Суғд 36-сола ва соҳиби се фарзанд аст. Пайвандонаш мегӯянд, аз соли 2016 дар Русия кору зиндагӣ мекард ва ҳоло аз сарнавишти баъдияш нигарон ҳастанд.

Вазири дифои Исроил 7 июн гуфт, ки нерӯҳои ин кишвар ҷасади як шаҳрванди Тайландро пайдо карданд, ки дар моҳи октябри соли 2023 аз сӯи гурӯҳи "Ҳамос" гаравгон гирифта шуда буд.

Ба гуфтаи вазири дифои Исроил, ҷасади Наттапонг Пинта дар ҷараёни амалиёти вижа дар Рафаҳ, дар ҷануби Ғазза, ба даст омадааст.

Тайландиҳо бузургтарин гурӯҳи ғайриисроилӣ буданд, ки дар ҳамлаи рӯзи 7 октябри соли 2023 гаравгон гирифта шуданд.

Ду рӯз пеш ҷасадҳои ду тани дигар, ки шаҳрвании Исроил ва Амрикоро доштанд, дар Ғазза пайдо шуд.

Панҷоҳу ду тани дигар ҳанӯз дар дасти "Ҳамос" ҳастанд, ки Исроил мегӯяд беш аз ниме аз онҳо кушта шудаанд.

Рӯзи 7 октябри соли 2023 гурӯҳи фаластинии "Ҳамос" дар ҳамла бар "Исроил" наздик ба 1200 танро кушт ва 251 каси дигарро гаравгон гирифт.

Вазорати тандурустии Ғазза, ки таҳти назорати "Ҳамос" аст, мегӯяд, ки аз он замон то кунун дар пайи ҳамлаҳои Исроил ба ин борика беш аз 54 ҳазор нафар кушта шудаанд. Аксари кушташудаҳо занон ва кӯдакон ҳастанд.

Бар асари ҳамлаи густурдаи Русия ба Украина дар субҳи 7 июн, се нафар дар шаҳри Харков ва як зану шавҳар дар Херсон, ба ҳалокат расиданд.

Русия дар ин ҳамла аз мушакҳо ва ҳавопаймоҳои бесарнишин, истифода кардааст.

Игор Терехов, шаҳрдори Харков гуфт, ки ин шаҳр бо 48 паҳбоди сохти Эрон, ду мушак ва чаҳор бомбаи ҳидоятшуда, мавриди ҳамла қарор гирифт. Харков 1,4 миллион аҳолӣ дорад ва дар 50-километрии марзи Русия дар шимол-шарқи Украина ҷойгир аст.

Терехов гуфт, ки дар ҳамлаҳои Русия ҳамчуни 17 нафар захмӣ шуданд.

Ба гуфтаи вай, як зан аз зери вайронаҳои як бинои баландошёна зинда берун оварда шуд.

Ҳокими минтақаи Харков Олег Синегубов гуфт, ду кӯдак ҳам дар ин ҳамла захмӣ шудаанд.

Доналд Трамп, раисҷумҳури Амрико эълон кард, ки 9 июн се тан аз мақомҳои кобинаи ӯ бо намояндагони Чин дар Лондон мулоқот хоҳанд кард, то дар мавриди як созиши тиҷоратӣ гуфтугӯ кунанд.

Трамп рӯзи ҷумъа дар шабакаи иҷтимоии Truth Social навишт, ки вазирони молия, тиҷорат ва намояндаи тиҷорати Амрико, дар ин нишаст иштирок хоҳад кард. Раиси ҷумҳури Амрико ҳамчунин навиштааст, ки "ин нишаст бояд бисёр хуб пеш биравад".

Барномарезии ин нишаст як рӯз пас аз он сурат гирифт, ки Доналд Трамп бо Си Ҷинпин, раисҷумҳури Чин, телефонӣ суҳбат кард. Ин тамос дар ҳоле сурат гирифт, ки таниши тиҷоратӣ байни ду кишвар афзоиш ёфтааст.

Бо онки Амрико ва Чин ахиран як созиши 90-рӯзаро дар бораи бекор кардани шуморе аз таърифа ё боҷҳои тиҷоратӣ имзо карданд, аммо ин созиши муваққат, ба нигарониҳои густурдатар поён надод.

Пулиси вилояти Хатлон аз боздошти марде хабар дод, ки худро корманди ҳифзи ҳуқуқ муаррифӣ намуда, бо истифода аз боварии сокинон дар чанд ҳолат даст ба қаллобӣ задааст.

Ба иттилои идораи пулиси вилоят, марди 31-солаи сокини Душанбе ба яке аз маркази хидматрасонии бонкии "Душанбе ситӣ" дар ноҳияи Дӯстӣ даромада, аз як корманди марказ 15 ҳазор сомонӣ гирифта, ғайб мезанад.

Корманди ин марказ дар навори пахшнамудаи мақомот тасдиқ мекунад, ки боздоштшуда худро корманди прокуратура муаррифӣ кардааст. Маълум нест навор дар чӣ шароит сабт шудааст.

Пулис мегӯяд, дастгиршуда бо ҳамон шева, яъне муаррифии худ ҳамчун корманди ҳифзи ҳуқуқ аз чанд дӯкони гӯштфурӯшии сокинони ноҳияи Дӯстӣ аз ҳазор то ду ҳазор сомонӣ бо ваъдаи баргардонидан гирифтааст.

Нисбати марди гумонзад ба қаллобӣ ва дуздӣ, парвандаи ҷиноӣ боз шудааст. Назари ӯ ба чунин иттиҳом маълум нест.

Дар шаҳри Деҳлии Нав рӯзи 6 июн ҷаласаи вазирони корҳои хориҷии Ҳинд ва давлатҳои Осиёи Марказӣ баргузор мешавад ва Тоҷикистонро дар ин нишаст вазир Сироҷиддин Муҳриддин намояндагӣ хоҳад кард.

ВКХ Тоҷикистон гуфт, Муҳриддин рӯзи панҷшанбе бо ҳамтои ҳиндиаш Субраҳманям Ҷайшанкар дидору гуфтугӯ намуд. Дар мулоқот ба рушди ҳамкориҳо дар соҳаҳои сиёсӣ, тиҷоративу иқтисодӣ ва фарҳангиву гуманитарӣ таъкид гардид, навиштааст сомонаи ВКХ Тоҷикистон.

Дар саҳифааш дар Х вазири Ҳинд Ҷайшанкар аз “мулоқоти хубе” бо Сироҷиддин Муҳриддин хабар дода гуфтааст, ки ҷонибҳо “ба зарурати мубориза бар зидди терроризм дар минтақа таъкид карданд. Дар бораи тақвияти ҳамкориҳо дар бахши тиҷорат, сармоягузорӣ ва иртиботот изҳори назар намуданд”.

Сафорати Ҳинд дар Тоҷикистон қаблан хабар дод, ки дар нишасти вазирони корҳои хориҷии Ҳинду Осиёи Марказӣ дар таърихи 6 июн, ки бори чорум барпо мешавад, таваҷҷӯҳи хос “ба тақвияти минбаъдаи робитаҳои байни ин кишварҳо дар соҳаи тиҷорат, иртиботот, фанновариҳо ва ҳамкориҳо дар соҳаи рушд равона мешавад. Вазирони хориҷии кишварҳои Ҳинду Осиёи Марказӣ инчунин ба чолишҳои амниятии минтақавӣ ва дигар масоили ҷаҳонии мавриди таваҷҷӯҳи муштарак муроҷиат хоҳанд кард”.

Кишварҳои Осиёи Марказӣ бо дигар кишварҳои хориҷӣ ҳам дар чаҳорчӯби “5+1” маҳфилҳое барпо мекунанд.

Миллиардер Илон Маск дар шабакаи Х президенти ИМА Доналд Трампро, ки гуфт, аз Маск дилсард шудааст, интиқод кард. Маск дар посух ба Трамп навишт: “Бе ман Трамп дар интихобот мағлуб мешуд, демократҳо Маҷлиси намояндагонро таҳти назорат мегирифтанд ва ҷумҳурихоҳҳо дар Сенат мағлуб мешуданд. Чӣ носипосӣ”.

Изҳороти Маск баъди он нашр шуд, ки дар як нишасти хабарии рӯзи панҷшанбе дар Кохи Сафед Трамп гуфт, ки аз танқидҳои Маск дар робита бо тарҳи қонуне, ки дар он барномаи иқтисодии президент дарҷ ёфтааст, “ҳайратзада” ва “дилсард” шуд.

“Ман аз он ҷиҳат дилсард шудам, ки Илон дар бораи кор сари таҳияи қонун аз онҳое ҳам, ки ин ҷо нишастаанд, аз шумоён ҳам бештар маълумот дошт. Дар бораи ҳама чиз огаҳ буд. Ҳеҷ мушкиле бо ин масъала надошт”, гуфт Трамп дар нишасти матбуотии муштаракаш бо садри аъзами Олмон Фридрих Мертс дар рӯзи 5 июн. Ӯ афзуд, “ногаҳон ӯ фаҳмид, ки мушкиле пеш меояд ва он ҳам баъди он ки фаҳмид, мо бояд маблағгузории соҳаи электромобилҳоро коҳиш диҳем”.

Маск баъд дар як изҳороте дар шабакаи Х навишт, ки матни қонунро то замони қабули он надида буд. «Ба ман ҳеҷ гоҳ ин тарҳи қонунро нишон надоданд ва он чунон зуд қабул шуд, ки касе ҳам дар Конгресс барои хондани он дуруст вақт надошт».

Маск аъзои ҳизби ҷумҳурихоҳ ва президентро барои фосилагирӣ аз сиёсати эълоншудаи коҳиши камбуди буҷа танқид кард. Трамп дар посух гуфт, ки «оддитарин роҳи кам кардани буҷа» ин бекор кардани ҳама созишу барномаҳои дастгирии ширкатҳои Маск мебошад. Трамп дар Truth навишт, “Ҳамеша аз он дар ҳайрат будам, ки Байден ҳамин корро накард”.

Ба ин навишта Илон Маск гуфт, ширкати SpaceX барномаи киштии кайҳонии "Дрэгон"-ро мебандад, ки кайҳоннавардонро ба истгоҳи кайҳонӣ интиқол медиҳад.

Баъди ин ҷанҷоли лафзии Трампу Маск қимати саҳҳоми ширкати Tesla, ки ба миллиардер Маск марбут аст, то 15% коҳиш ёфт ва ин поинтарин уфти саҳҳом барои як рӯз дар давоми се моҳи охир дониста мешавад. SpaceX дар бозори саҳҳом иштирок намекунад. Маск барои маъракаи интихоботии Трамп беш аз 250 миллион доллар сарф карда дар маъмурияти ӯ кор кардааст.

Моҳи май Маҷлиси намояндагони Амрико қонуни андозу хароҷотро, ки онро худи Трамп як қонуни “бузург ва зебо” меномад, қабул кард. Дар Сенат аз ҷумла дар миёни ҷумҳуррихоҳҳо ин қонун бо мухолифатҳо рӯбарӯ шудааст.

Илон Маск рӯзи 30 май маъмурияти Трампро тарк кард. Он ҷо ӯ давоми 130 рӯз раҳбарии идораи муассирияти кори ҳукумат (DOGE)-ро раҳбарӣ мекард. Ин идораро бо мақсади кам кардани хароҷоти ҳукумат таъсис доданд. Баъди хатми давраи кор Трамп ба Маск калиди тиллоии рамзии Кохи Сафедро ҳамчун аломати сипос барои кораш тақдим намуд.

Дар масҷидҳои Тоҷикистон субҳи 5:45-и рӯзи 6 июн намози Иди Қурбон хонда шуд. Аксар сокинони ин кишвар мусалмон ва таҷлили ин ид барояшон муҳим дониста мешавад.

Дар остонаи ид президент Эмомалӣ Раҳмон дар паёми табрикиаш сокинони кишварро ба хайру эҳсонкорӣ, кӯмак ба ятимону маъюбон даъват кард ва ҳам роҳ ба надодан ба хароҷоти беҳуда ва исрофкорӣ даъват намуд.

Иди Қурбон дар Тоҷикистон як иди расмӣ аст ва ба ин муносибат мардум истироҳат мекунанд. Ба муносибати ид бархе хонаводаҳо чорво забҳ мекунанд. Зиёрати қабри гузаштагон ва аёдати хешовандону наздикон яке дигар аз одатҳои ид дониста мешавад.

Дар баъзе маҳалҳо кӯдакон ҳам ба идгардак баромаданд.

Президенти ИМА Доналд Трамп гуфт, хотима додан ба ҷанги Украина бо сабаби «душмании бисёр калони» миёни Русия ва Украина ва “нафрати” байни президентон Владимир Путин ва Владимир Зеленский бисёр душвор гардидааст.

Ӯ ин ҷангро ба ду кӯдаке шабоҳат дод, ки дар як боғе бо ҳам дармеафтанд ва гуфт, «гоҳо беҳтар аст, ки бимонӣ, онҳо як каме биҷанганд». Associated Press навишт, президенти ИМА ин ҳарфҳоро дар ҷараёни нишасти матбуотие бо иштироки садри аъзами Олмон Фридрих Мертс баён кард. Трамп бори дигар такрор кард, ки агар ӯ президент буд, ҳеҷ гоҳ ин ҷанг шурӯъ намешуд.

Трамп дар заминаи дастёбии зудтар ба сулҳ шубҳа баён ва таъкид намуд, ки аз президент Путин тақозо кардааст, ки дар паи ҳамлаҳо ба пойгоҳҳои ҳарбии Русия аз ҷониби Украина аз хештандорӣ кор бигирад.

Дар навбати худ, Мертс гуфт, ки барои хатми ҷанг дар Украина ҳамкории миёни кишварҳои аврупоиву ИМА зарур аст. Ӯ гуфт, ба фарқ аз Русия Украина ба муассисаҳои мулкӣ зарба намезанад.

Пеш аз шурӯи мулоқоти миёни раҳбарони Олмону ИМА, Фридрих Мертс ба Доналд Трамп шаҳодатномаи таваллуди бобои ӯ Фридрих Трампро дар Олмон тақдим намуд.

Нашрияи Deutsche Welle менависад, ки Мертс чандин сол пеш як дафъа шахсан бо Трамп мулоқоте доштааст, вале дар давоми чор ҳафтаи охири баъди интихоб шуданаш ба мақоми садри аъзами Олмон, борҳо бо ӯ телефонӣ ҳамсӯҳбат шудааст. Ин сӯҳбатҳо ҳам ба таври ҷудогона ва ҳам дар ҳалқаи раҳбарони дигари аврупоӣ сари мавзӯи ҷанг дар Украина тамаркуз ёфтааст. Вақтҳои охир онҳо ба ҳамдигар СМС ҳам мефиристанд, навишт Deutsche Welle.

Дар Вашингтон Мертс сафари якрӯза дорад. Моҳи июн қарор аст онҳо боз дар ду нишаст – дар ҷаласаи Гурӯҳи ҳафтгона дар Канада ва нишасти НАТО дар Нидерланди бо ҳам мулоқот кунанд.

Дар Покистон куштори духтари 17-солае, ки чун блогери интернетӣ маъруф буд, хашми занонро барангехт. Сано Юсуфро дар дохили манзилаш дар шаҳри Исломобод рӯзи 2 июн аз тири туфанг ба ҳалокат расониданд. Полис гуфт, ки дар робита бо ин куштор марди 22-солаеро боздошт намуд.

Зоҳиран, Сано Юсуф пешниҳоди дӯстии ин ҷавонро рад карда буд. Ин ҳодиса бисёр занонро дар Покистон, ки 240 миллион ҷамъият дорад, ба хашм овард, чун ҳодисаҳои хушунат, азияту озори занону духтарон дар ин кишвар мушкили дерина мебошад.

Шод Бегум, як фаъоли ҳуқуқи занон дар шаҳри Исломобод мегӯяд, “занҳо ба хашм омадаанд”. Ӯ афзуд, бахусус ҳодисаҳои “аз ҷониби баъзе мардони тангназар сафед кардани ин куштор бештар ғазаболуд мекунад”.

Баъди куштори наврас шарҳу назарҳо дар шабакаҳои иҷтимоӣ тақрибан ба ду тақсим шуданд. Як гурӯҳ мардон гуфтанд, ки барои духтаре аз як ҷомеаи суннатӣ дуруст нест, ки худро дар интернет намоиш диҳад, вале занҳо инро ғайри қобили қабул медонанд.

Юсуф дар шабакаҳои иҷтимоӣ беш аз як миллион пайрав дошт ва ҳафтаи гузашта аз зодрӯзи худ навори видеоӣ нашр карда буд. Ӯ асосан бо таблиғи маҳсулоти ороишӣ маъруф буд.

Рӯзи 5 июн дар шаҳри Пешавар фаъолон ба нишони эътироз аз куштори Юсуф намоиши эътирозӣ барпо карданд.

Куштори Юсуф барои истифодаи фаъоли шабакаҳои иҷтимоӣ ягона нест. Моҳи январ дар шаҳри Кветта Анвар ул-Ҳақ, як сокини маҳаллиро барои ташкили куштори духтари 14-солааш, ки матолибашро дар TikTok чун рафтори “ғайриахлоқӣ” писанд намекард, ҳабс карданд.

Моҳи октябр мардеро, ки эътироф кард чор занро аз ҳисоби хешовандонаш барои нашри матолиб дар TikTok куштааст, боздошт намуд. Дар Покистон ҳар сол садҳо зан ва аксари онҳо аз дасти мардони хешашон ба унвони “кушторҳои номусӣ” ҷони худро аз даст медиҳанд.

Дастаи мунтахаби футболи Тоҷикистон зери раҳбарии сармураббӣ Гела Шекиладзе, мутахассиси гурҷӣ, дар бозии байналмилалии дӯстона тими миллии Камбоҷаро бо ҳисоби 2:1 мағлуб кард.

Ин вохӯрӣ, ки марҳилаи омодагӣ ба бозӣ муқобили тими миллии Филиппин дар мусобиқоти интихобии Ҷоми Осиё-2027 мебошад, рӯзи панҷшанбеи 5-уми июн бо ҳузури беш аз 13 ҳазор тамошогар дар Варзишгоҳи миллии олимпии пойтахти Камбоҷа - шаҳри Пномпен – доир гардид.

Ҳарсе гол дар нимаи дуюми дидор зада шуд. Ҳамлагари мунтахаби Тоҷикистон Шаҳром Самиев дар дақиқаи 51-ум тӯбро аз ҷаримагоҳи мизбонон ба дарвоза ворид карда, ҳисобро кушод. Голи дуюми меҳмононро нимҳимоятгар Эҳсони Панҷшанбе дар дақиқаи 63-юми дидор аз масофаи наздик ба самар расонд. Дар дақиқаи 71-ум мизбонон ҳисоби бозиро тағйир доданд – 1:2.

Қаблан тимҳои миллии Камбоҷа ва Тоҷикистон як маротиба – соли 2011 - дар марҳилаи гурӯҳии Ҷоми даъвати AFC (Конфедератсияи футболи Осиё) рақобат карда буданд. Бозӣ бо пирӯзии мунтахаби Тоҷикистон бо ҳисоби 3:0 анҷом ёфта буд.

Бозии дӯстона

Камбоҷа - Тоҷикистон – 1:2

Голҳо: Шаҳром Самиев, 51 (0:1). Эҳсони Панҷшанбе, 63 (0:2). Мин Ратанаҷ, 71 (1:2).

Тоҷикистон: Олег Баклов, Содиқҷон Қурбонов (Меҳрубон Каримов, 81), Зоир Ҷурабоев, Табрез Исломов, Манучеҳр Сафаров, Шуҳрат Элмуродов (Амирбек Ҷурабоев, 46), Фатҳулло Олимзода (Эҳсони Панҷшанбе, 46), Ҳамадонӣ Камолов (Мусо Қаҳҳоров, 65), Шервонӣ Мабатшоев, Алиҷони Буризод (Парвизҷон Умарбоев, 59), Шериддин Бобоев (Шаҳром Самиев, 46).

5-уми июн. Пномпен. Варзишгоҳи миллии олимпӣ. 13 780 тамошобин.

Ҳамакнун тими миллии Тоҷикистон ба Филиппин сафар мекунад. Бозии даври дуюми марҳилаи интихобии Ҷоми Осиё-2027 муқобили мунтахаби Филиппин 10-уми июн дар варзишгоҳи «Ню-Кларк-Сити»-и шаҳри Капас соати 16 бо вақти маҳаллӣ (соати 14 бо вақти Душанбе) шуруъ мешавад.

Рақибони дастаи мунтахаби Тоҷикистон дар марҳилаи интихобии Ҷоми Осиё-2027 дар гурӯҳи “А” тимҳои миллии Филиппин, Молдив ва Тимори Шарқӣ мебошанд.

Дастаи мунтахаби Тоҷикистон дар даври аввали марҳилаи интихобии Ҷоми Осиё-2027, ки 25-уми марти имсол дар Варзишгоҳи марказии Душанбе доир гардид, бар тими миллии Тимори Шарқӣ бо ҳисоби 1:0 пирӯз шуд.

Баъди натиҷагирии бозиҳои даври якуми мусобиқот дар гурӯҳи “А” дастаҳои мунтахаби Филиппин ва Тоҷикистон бо сеимтиёзӣ пешсафанд.

Дар натиҷаи қуръакашии марҳилаи гурӯҳии Ҷоми Осиё-2027 тимҳои миллӣ ба шаш гурӯҳи иборат аз чаҳордастаӣ тақсим шудаанд. Танҳо ғолибони гурӯҳҳо ба қисми ниҳоии Ҷоми Осиё, ки аз 15-уми январ то 8-уми феврали соли 2027 дар Арабистони Саудӣ баргузор мешавад, роҳ меёбанд.

Додгоҳе дар Қазоқистон занеро, ки дар моҳи охири ҳомиладорӣ мебошад, ба ду соли зиндон маҳкум кард. Додгоҳе дар вилояти Қазоқистони Шимолӣ Жаслу Дарҳамбоеваи 35-сола, занеро, ки дар моҳи охири ҳомиладорӣ аст, бо иттиҳоми “барангехтани адовати миллӣ” дар шабакаи TikTok гунаҳор кардааст.

Ташхис маълум кардааст, ки дар суханҳои ӯ “таҳқири шаҳрвандони миллаташон рус” мушоҳида мешавад. Дар ин бора рӯзи 5 июн бахши Қазоқии Радиои Озодӣ хабар дод.

Дар як навори видеоӣ зан дар муроҷиат ба президенти Русия Владимир Путин мегӯяд, соли 2025 “мӯҳлати истифода аз замине”, ки Русия аз Қазоқистон гирифтааст, фаро мерасад ва талаб кардааст, ки чандин минтақаи марзӣ “баргардонида шаванд”.

Чанд моҳ баъди он занро ба додгоҳ кашиданд. Дарҳамбоева дар изҳороташ гуфтааст, қазоқҳо дар гузашта талафоти зиёд дода, гуруснагиро пуштисар кардаанд ва баъдан ба таҳқири русҳо мегузарад.

Додгоҳи ноҳиявии ба номи Габит Мусрепов гуфтааст, бо суханрониҳояш Дарҳамбоева “миллат ва шаъни миллиро таҳқир кардааст, ки чун барангехтани низои миллӣ арзёбӣ мешавад”. Дарҳабоева дар мурофиа гуфтааст, ки гуноҳашро эътироф мекунад ва нақл кардааст, ки дар зиндагӣ бо таҳқиру азияти зиёде бар пояи миллӣ рӯбарӯ шудааст.

Дарҳамбоеваро, ки дар моҳи ҳаштуми ҳомиладорӣ мебошад, ба ду соли маҳрумият аз озодӣ маҳкум ва ба боздоштгоҳи шаҳри Петропавловск интиқол доданд. Бародари зан Ерлик Дарҳамбоев гуфтааст, ин амали мақомот хилоф бо меъёрҳои башардӯстона мебошад.

Дастаи мунтахаби ҷавонони то 18-солаи Тоҷикистон зери раҳбарии Марко Раҷини, мутахассиси итолиёӣ, дар мусобиқоти қаҳрамонии Ассотсиатсияи футболи Осиёи Марказӣ (CAFA U-20), ки аз 10-ум то 17-уми июн дар шаҳрҳои Ҳисор ва Турсунзода баргузор мешавад, ширкат меварзад.

Ба иттилиои Федератсияи футболи Тоҷикистон, дар мусобиқоти қаҳрамонии CAFА-2025 шаш даста – Тоҷикистон, Узбекистон, Эрон, Қирғизистон, Туркманистон ва Афғонистон - иштирок хоҳанд кард.

Аз рӯи натиҷаи қуръакашӣ дастаҳо ба ду гурӯҳ ҷудо мешаванд. Тибқи низомномаи мусобиқот дастаҳо дар марҳилаи гурӯҳӣ дар шакли даврӣ бозӣ мекунанд.

Сипас, ғолибони гурӯҳҳо дар финал вомехӯранд. Дастаҳое, ки дар гурӯҳҳои худ ҷойи дуюмро мегиранд, дар бозӣ барои ҷойи сеюм рӯбарӯ хоҳанд шуд. Инчунин барои ҷойҳои панҷуму шашум бозии тасаллобахш баргузор мешавад.

Бозиҳои мусобиқоти қаҳрамонии CAFА-2025 дар Варзишгоҳи марказии Ҳисор ва «ТАЛКО Арена»-и шаҳри Турсунзода доир мегарданд.

Бояд гуфт, ки асоси дастаи мунтахаби ҷавонони Тоҷикистон (U-18) аз ҳисоби бозигарони мунтахаби наврасони кишвар (U-17) иборат аст, ки моҳи ноябр дар Ҷоми ҷаҳон-2025 дар Қатар ширкат мекунад.

Ёдовар мешавем, дастаи мунтахаби наврасони то 17-солаи Тоҷикистон зери раҳбарии сармураббӣ Марко Раҷини дар Ҷоми Осиё-2025 дар Арабистони Саудӣ дар маҷмуъ чаҳор бозӣ анҷом дода, ба марҳилаи чорякниҳоӣ роҳ ёфт ва ба Ҷоми ҷаҳон-2025, ки аз 3-юм то 27-уми ноябр дар Қатар баргузор мешавад, роҳхат гирифт.

Наврасони тоҷик дар марҳилаи гурӯҳии мусобиқот бар дастаҳои Уммон (2:1) ва Эрон (3:1) пирӯз шуда, аз тими Кореяи Шимолӣ (0:3) шикаст хӯрда, дар даври чорякниҳоӣ аз тими Кореяи Ҷанубӣ аз рӯи силсилазарбаҳои пеналти бо ҳисоби 3:5 (замони асосӣ – 2:2) мағлуб шуданд.

Марко Раҷини гуфт, «бовар дорам, ки дастаи Тоҷикистон дар қаҳрамонии ҷаҳон ба сатҳи баланд мебарояд ва бачаҳои мо боз моро ба ҳайрат меоранд.”

Бояд зикр намуд, ки дастаи мунтахаби наврасони Тоҷикистон (U-17) бори сеюм дар таърихи худ ба қисми ниҳоии мусобиқоти қаҳрамонии ҷаҳон роҳ ёфт. Қаблан наврасони тоҷик дар қаҳрамонии ҷаҳон дар Кореяи Ҷанубӣ (соли 2007) ва Бразилия (соли 2019) ширкат карда буданд.

Раёсати Кумитаи тафтишот дар шаҳри Маскав аз рӯи ҳодисаи рабоиши соҳибкор ва блогер Арег Шепихин дар маркази пойтахти Русия парвандаи ҷиноӣ боз кардааст. Дар ин бора рӯзи 5 июн дафтари матбуоти ин идора хабар додааст. Чунин қарор бар асоси таҳқиқи наворҳои видеоии “амалҳои ғайриқонунии гурӯҳи нафарон” дар назди истгоҳи роҳи оҳани Ярославский қабул шуд.

Маълум нест, ки парванда аз рӯи кадом моддаи Кодекси ҷиноӣ боз шудааст. Кумитаи тафтишот гуфт, ки гумонбарон ба дафтари ин ниҳод дар шаҳри Маскав интиқол ва боздошт шудаанд.

Шепихинро рӯзи 3 июн рабуданд. Ба иттилои матбуоти маҳаллӣ, ӯро дар назди истгоҳи роҳи оҳан боздошт намуда дар дохили бордони мошине, ки ба мақомоти Чеченистон рабт дода мешавад, ба ҷои номаълум бурданд.

Ҳодисаи одамрабоӣ ва беамалии полиси Русия дар муқобили гурӯҳе, ки ба ҳукумати Чеченистон рабт дорад, мавриди хашми бисёр корбарон дар шабакаҳои иҷтимоӣ гардид.

Як намояндаи мақомоти Чеченистон рӯзи 4 июн гуфт, ки Арег Шепихин, ки дар бораи чеченҳову дини Ислом шарҳҳои тунде ба забон овардааст, “рабуда неву, боздошт шудааст”.

Баъди сару садои зиёд дар шабакаҳо, вазири сиёсати миллии Чеченистон Аҳмад Дудаев дар Телеграм навишт, ки ВКД Чеченистон аз рӯи як қатор иттиҳомҳо Шепихинро бозпурсӣ мекунад.

Ӯ афзуд, Шепихин “рабуда неву бо дасти кормандони сохторҳои ҳифзи қонун, ки бо идораҳои дахлдори Маскав ҳамкорӣ мекунанд, боздошт шудааст”. Ӯ гуфт, Шепихинро бар асоси “муқаррароти тафтишотӣ” ба ҷавобгарии ҷиноӣ ҷалб хоҳанд кард. Дар куҷо будани Шепихин маълум нест, вале Baza бо такя ба маълумоти худ навишт, ки ӯро латукӯб ва маҷбур карданд, ки дар навори видеоӣ узрхоҳӣ кунад ва соатҳои 12 шаби 3 июн озод карданд.

Телеграм-канал ВЧК-ОГПУ гуфт, ки «блогер бо кӯмаки Кремл ва муовини аввали ФСБ Сергей Королев» озод карда шуд. Тасдиқи дурустии ин иттило дар даст нест. ВКД-и Русия ин хабарро шарҳ надодааст.

Дар гузашта сохторҳои ҳифзи қонуни Чеченистон чандин бор даст ба рабоиши онҳое задаанд, ки дар Чеченистон зидди онҳо парвандаи ҷиноӣ боз шудааст. Аз ҷумла, бо чунин роҳ Седа Сулаймонова аз Петербург ва Зарема Мусоева аз Нижний Новгород рабуда шуда буданд.

Маълумоти иктишофии ИМА ҳисоб кардааст, ки дар натиҷаи ҳамлаҳои ҳавоии украиниҳо болои фурудгоҳҳои ҳарбии Русия рӯзи 1 июн 20 ҳавопаймо аз кор бароварда шуд. Дар ин бора рӯзи 5-уми июн хабаргузории Reuters бо такя ба мақомоти амрикоӣ хабар додааст.

Аз ин миён даҳ ҳавопаймо нобуд карда шуда дигарҳо осеб дидаанд. Ин рақам бо изҳороти пешини президенти Украина Владимир Зеленский, ки гуфт, 41 ҳавопаймои ҳарбии русиро корношоям ва аз ин миён нисфашро нобуд кардаанд, дар ихтилоф аст.

Айни замон, манбаъҳои Reuters ба аҳамияти ин амалиёт таъкид карда тахмин карданд, ки дар натиҷа эҳтимолан Русия мавқеашро дар музокираҳо оид ба оташбас сахттар хоҳад кард. Намояндагони мақомоти амрикоӣ мегӯянд, ки дар бораи омодагии Украина ба чунин як амалиёт аз пеш хабар надоштанд.

Рӯзи сешанбе дар мусоҳибаи телевизиониаш намояндаи вижаи президенти ИМА Кит Келлог огоҳ кард, ки амалиёти “Анкабут” хатари тавсеаёбии ихтилофҳои миёни Украина ва Русияро бештар мекунад, чун Украина ба яке аз “пойдерворҳои” ҳарбиаш зарба задааст. Баъди сӯҳбати телефонӣ бо президенти Русия Владимир Путин раҳбари ИМА Доналд Трамп гуфт, ки Маскав ният дорад барои ин амалиёт посух диҳад.

Нахуствазири Русия Михаил Мишустин дар ҷаласаи сарони ҳукуматҳои Иттиҳоди давлатҳои мустақил (ИДМ) аз кишварҳои узви ин созмон даъват кард, ки ба созишномаи интиқоли транзитии ягонаи Иттиҳоди иқтисодии Авруосиё ҳамроҳ шаванд.

Мишустин, ки яке аз ширкатдорони ҷаласа дар Душанбе аст, рӯзи 5 июн, аз ҷумла гуфт: “Тавсеаи ҳамкориҳои миёни ИДМ ва Иттиҳоди иқтисодии Авруосиёро муҳим медонем. Бо назардошти танготанг будани робитаҳои миёни кишварҳои мо, бояд барои наздиктар кардани муқаррароти меъёрию ҳуқуқии ин ду иттиҳод кор кунем”.

Ӯ низоми воҳиди транзити гумрукиро барои беҳбуди шароити савдову тиҷорат ва таъмини амнияти интиқоли борҳо манфиатовар номид. Маълум нест, то куҷо ин даъватро ҳама кишварҳои узви ИДМ мепазиранд.

Масалан, Тоҷикистон чандин сол боз нишон медиҳад, ки ба узвият дар Иттиҳоди иқтисодии Авруосиё шитоб намекунад, зоҳиран аз вобастагии иқтисодию сиёсии бештар аз ин созмони зери назари Русия андеша дорад ва дар паи ҷустуҷӯи роҳҳои алтернативии баромадан ба бозори беруна тавассути кишварҳои Қафқоз ва Осиёи Ҷанубӣ мебошад.

Ҷаласаи сарони ҳукуматҳои ИДМ рӯзи панҷшанбе дар пойтахти Тоҷикистон – раҳбари давраии ин созмон барои соли 2025 - ба кор оғоз кард. Субҳ нахуствазирони Озарбойҷон, Беларус, Русия, Қирғизистон, Қазоқистон, Узбекистон, Арманистон, Туркманистон ва Тоҷикистон, ки кишварҳои узви ин созмон мебошанд, бо президент Эмомалӣ Раҳмон мулоқот карданд.

Ба навиштаи сомонаи президенти Тоҷикистон, қабули Нақшаи чорабиниҳо оиди татбиқи марҳилаи дуюми Стратегияи рушди иқтисодии ИДМ барои давраи то соли 2030 масъалаи муҳими раёсати Тоҷикистон дар доираи Иттиҳод мебошад.

Ҷаласаи баъдии раҳбарони ҳукуматҳои кишварҳои узви ИДМ 30 сентябр дар шаҳри Минск барпо мешавад.

ИДМ дар овори Иттиҳоди Шӯравӣ бунёд шуд, ки расман соли 1991 пош хӯрд. Маскав дар талоши ҳифзи нуфузаш дар қаламравҳои собиқи шӯравӣ ба таъсиси ин иттиҳод замина гузошт, вале бархе ҷумҳуриҳои мухолиф бо сиёсати Кремлин, аз ҷумла ҷумҳуриҳои назди Балтика, Гурҷистон ва баъдан Украина ҳамоиш дар ин созмонро напазируфтанд.